Bugun O‘zbekiston Professional futbol ligasi “Nasaf-Farm” jamoasi kelgusi yilda Pro Liga musobaqalarida ishtirok etmasligini e’lon qildi. Bu xabar yurtimizdagi OAV orqali yoritildi va muxlislar uni turlicha qabul qilishdi. Klubimiz prezidenti Shuhrat Aslanov bu holat yuzasidan o‘z fikrlarini bildirdi.

- “Nasaf-Farm” jamoasi bu yil 1-Liga musobaqalarida chempionlikni qo‘lga kiritdi. Bu yutuq futbolchilar, murabbiylar va albatta bizni ham xursand qildi. Chempionlik kelgusi mavsumda Pro Ligada ishtirok etish imkoniyatini beradi. Lekin Pro Ligada asosan Superligaga chiqishni maqsad qilgan jamoalar ishtirok etishi hammaga ma’lum.

“Nasaf-Farm” jamoasining Pro Ligada qatnashmasligi futbolchilar va ularning ota-onalari uchun ma’lum darajada g‘amgin xabar bo‘lishi mumkin. Ammo buning ikkinchi tomoni ham bor. “Nasaf” futbol klubida yaxshi tizim yo‘lga qo‘yilgan bo‘lib, klub qoshida futbol maktabi faoliyat yuritadi. Mazkur maktabning U-19 va U-21 yoshdagi tarbiyalanuvchilari ham PFL musobaqalarida ishtirok etishadi. Yosh chegarasi tufayli o‘yin amaliyotisiz qolgan yosh va umidli futbolchilar uchun aynan “Nasaf-Farm” jamoasi tashkil etilgan edi.

Biz o‘z futbol maktabimizdan chiqqan yoshlarga uchinchi yildirki imkoniyat yaratib kelyapmiz. Bu jamoaning asosiy vazifasi bosh jamoaga iqtidorli futbolchilarni yetkazib berishdir. Qishki yig‘inlar davomida ham farm jamoadan futbolchilarni ko‘rikdan o‘tkazish rejalashtirilgan.

Farm jamoaning Pro Ligada qatnashishi klubning yillik xarajatlariga qo‘shimcha yuklama bo‘ladi. Shu sababli jamoa kelgusi yilda Pro Ligada emas, balki 1-Ligada ishtirokini davom ettiradi. “Nasaf”ning rivojlanish strategiyasiga muvofiq, ushbu mablag‘lar futbol maktabining U-19, U-21 va “Nasaf-Farm” jamoalarining kelgusi yilda sifatli ishtirok etishini ta’minlashga yo‘naltiriladi.