Бугун Ўзбекистон Профессионал футбол лигаси “Насаф-Фарм” жамоаси келгуси йилда Про Лига мусобақаларида иштирок этмаслигини эълон қилди. Бу хабар юртимиздаги ОАВ орқали ёритилди ва мухлислар уни турлича қабул қилишди. Клубимиз президенти Шуҳрат Асланов бу ҳолат юзасидан ўз фикрларини билдирди.

- “Насаф-Фарм” жамоаси бу йил 1-Лига мусобақаларида чемпионликни қўлга киритди. Бу ютуқ футболчилар, мураббийлар ва албатта бизни ҳам хурсанд қилди. Чемпионлик келгуси мавсумда Про Лигада иштирок этиш имкониятини беради. Лекин Про Лигада асосан Суперлигага чиқишни мақсад қилган жамоалар иштирок этиши ҳаммага маълум.

“Насаф-Фарм” жамоасининг Про Лигада қатнашмаслиги футболчилар ва уларнинг ота-оналари учун маълум даражада ғамгин хабар бўлиши мумкин. Аммо бунинг иккинчи томони ҳам бор. “Насаф” футбол клубида яхши тизим йўлга қўйилган бўлиб, клуб қошида футбол мактаби фаолият юритади. Мазкур мактабнинг U-19 ва U-21 ёшдаги тарбияланувчилари ҳам ПФЛ мусобақаларида иштирок этишади. Ёш чегараси туфайли ўйин амалиётисиз қолган ёш ва умидли футболчилар учун айнан “Насаф-Фарм” жамоаси ташкил этилган эди.

Биз ўз футбол мактабимиздан чиққан ёшларга учинчи йилдирки имконият яратиб келяпмиз. Бу жамоанинг асосий вазифаси бош жамоага иқтидорли футболчиларни етказиб беришдир. Қишки йиғинлар давомида ҳам фарм жамоадан футболчиларни кўрикдан ўтказиш режалаштирилган.

Фарм жамоанинг Про Лигада қатнашиши клубнинг йиллик харажатларига қўшимча юклама бўлади. Шу сабабли жамоа келгуси йилда Про Лигада эмас, балки 1-Лигада иштирокини давом эттиради. “Насаф”нинг ривожланиш стратегиясига мувофиқ, ушбу маблағлар футбол мактабининг U-19, U-21 ва “Насаф-Фарм” жамоаларининг келгуси йилда сифатли иштирок этишини таъминлашга йўналтирилади.