Stadiondagi muammolar sabab so‘nggi yillarda raqiblarini boshqa shaharlarda qabul qilgan "Surxon" 2025 yilgi mavsumdan e’tiboran o‘z uyiga qaytadi, deya xabar berdi liga matbuot xizmati.
Termizdagi "Surxon" arena maydoni, uning drenaj va sug‘orish tizimi, shuningdek, stadion yoritish tizimi Liga talablari asosida ta’mirdan chiqarilgan. Shuningdek, stadion ortida yana bitta tabiiy maydon bunyod etilgan bo‘lib, bu yerda U-21 jamoasi o‘z raqiblarini qabul qilishi ko‘zda tutilgan.
Termiz qolgan shaharlarga nisbatan uzoqroq ekanidan kelib chiqib, Assosiasiya va "Surxon" o‘zaro hamkorlikda VAR texnikasi xarid qilgan. Mazkur texnika stadionga o‘rnatiladi va undan Superliga bellashuvlari davomida foydalaniladi. Shuningdek, viloyat televideniyesi Termizdagi uchrashuvlarni teletranslyasiya qilishi masalasida ish olib boriladi.
