"Liverpul" vingeri Muhammad Saloh nima uchun bu mavsumda Chempionlar ligasidan ko‘ra ko‘proq Angliya Premyer-ligasida g‘alaba qozonishni istashini tushuntirdi.
"Oxirgi yetti-sakkiz yil davomida bergan intervyularimda doim Chempionlar ligasida g‘olib chiqishni xohlayotganimni aytganman. Lekin birinchi marta "Liverpul" bilan APLda g‘olib chiqishni juda xohlayotganimni aytyapman.
Nega? Umuman xabarim yo‘q. Balki oxirgi marta g‘alabani o‘zimiz xohlagandek nishonlamaganimiz uchundir ("Liverpul" 2019/2020 yilgi mavsumda koronavirus pandemiyasi tufayli cheklovlar bilan o‘ynagan Premyer-ligada g‘olib chiqqandi). Shuningdek, bu yerga qaytib kelganimdan so‘ng, bu mening klubdagi so‘nggi yilim ekanligini tushunaman va men shahar uchun o‘ziga xos bir ish qilmoqchiman", - dedi Saloh Sky Sports bilan suhbatda.
Premyer-liganing 18 o‘yinidan so‘ng, "Liverpul" 45 ochkoga ega va birinchi o‘rinda, eng yaqin ta’qibchisi "Arsenal"dan 6 ochko oldinda, "qizillar"da bitta zaxira o‘yini bor.
