"Ливерпуль" вингери Муҳаммад Салоҳ нима учун бу мавсумда Чемпионлар лигасидан кўра кўпроқ Англия Премьер-лигасида ғалаба қозонишни исташини тушунтирди.
"Охирги етти-саккиз йил давомида берган интервьюларимда доим Чемпионлар лигасида ғолиб чиқишни хоҳлаётганимни айтганман. Лекин биринчи марта "Ливерпуль" билан АПЛда ғолиб чиқишни жуда хоҳлаётганимни айтяпман.
Нега? Умуман хабарим йўқ. Балки охирги марта ғалабани ўзимиз хоҳлагандек нишонламаганимиз учундир ("Ливерпуль" 2019/2020 йилги мавсумда коронавирус пандемияси туфайли чекловлар билан ўйнаган Премьер-лигада ғолиб чиққанди). Шунингдек, бу ерга қайтиб келганимдан сўнг, бу менинг клубдаги сўнгги йилим эканлигини тушунаман ва мен шаҳар учун ўзига хос бир иш қилмоқчиман", - деди Салоҳ Sky Sports билан суҳбатда.
Премьер-лиганинг 18 ўйинидан сўнг, "Ливерпуль" 45 очкога эга ва биринчи ўринда, энг яқин таъқибчиси "Арсенал"дан 6 очко олдинда, "қизиллар"да битта захира ўйини бор.
