Olimpiya o‘yinlarida atletlarimiz shohsupaga ko‘tarilish uchun dunyoning ko‘plab nomdor sportchilarini mag‘lubiyatga uchratishgan. Bugun bir qiziq fakt bilan bo‘lishmoqchimiz. Bu Olimpiadalarda medallarga asosiy da’vogar sanalgan, biroq har gal o‘zbek o‘g‘lonlariga mag‘lub bo‘lgan taniqli nom haqida bo‘ladi.

Nikoloz Sherazadishvili dzyudo olamida katta shuhratga ega sportchi hisoblanadi. Ispaniyalik ikki karra jahon chempioni har bir musobaqada medallarga asosiy da’vogarlardan sanalsada, lekin hech bir Olimpiadada uning omadi kelmaydi. Tokioda ham, Parijda ham uni medallardan mosuvo bo‘lishiga o‘zbek polvonlari sababchi.

Tokio-2020 yozgi Olimpiya o‘yinlari. -90 kg vazn toifasida chorak finalda imkoniyatni boy bergan Davlat Bobonov va Niko bronza medali uchun o‘tish bosqichida o‘zaro to‘qnash kelishdi. Ungacha Sherazadishvili uch bor Bobonovdan ustun kelgani uchun ko‘pchilik o‘sha qarama-qarshilikda ispaniyalik sportchining imkoniyatlarini yuqori baholadi. Biroq yakun umuman boshqacha bo‘ldi. Davlat bir necha hafta oldin jahon chempionati finalidagi va undan avvalgi mag‘lubiyatlari uchun munosib revansh oldi hamda uzoq kutilgan Olimpiada medali sari muhim qadam tashladi. Shu bilan Sherazadishvili -90 kg vazn toifasida qaytib ko‘rinish bermadi.

Parij-2024 yozgi Olimpiya o‘yinlari. Qahramonimiz bu gal -100 kg vazn toifasida Olimpiada medali uchun jiddiy bel bog‘lab keldi. Biroq yana chorak finalda yengildi. Bronza medali uchun o‘tish bosqichi esa yaponiyalik amaldagi Olimpiada chempioni Aaron Volfni mag‘lubiyatga uchratgach, unda shohsupaga ko‘tarilish uchun umid paydo bo‘ldi. Biroq bu umidni endi Muzaffarbek To‘raboyev so‘ndirdi. Yarim finalda imkoniyatni boy bergan To‘raboyev bronza medali uchun bellashuvda Sherazadishvilidan ustun kelib, taniqli ispan polvoni bu gal ham medalsiz qolishiga sababchi bo‘ldi.