"Chelsi" himoyachi Trevo Chalobani "Kristal Pelas"dagi ijara muddatidan erta qaytarishga haqqi yo‘q.
Kecha "Chelsi" bosh murabbiyi Enso Mareska o‘zining matbuot anjumanida himoyachi Uesli Fofana tizzasidan olgan jarohati tufayli bu mavsumda boshqa maydonga tusha olmasligini aytdi.
"Chelsi" bu vaziyatga tezda javob qaytardi va 19 yoshli Anselminoni "Boka Xuniors"dagi ijarasidan qaytarib oldi. Ammo "ko‘klar" Chaloba bilan buni qila olmaydi.
Evening Standard nashri xabariga ko‘ra, Chalobaning ijara shartnomasi 2024/25 yilgi mavsum oxirigacha amal qiladi va yanvarda bekor qilish variantini o‘z ichiga olmaydi.
Chaloba Premyer-ligadagi so‘nggi 13 o‘yinning 12 tasida maydonga tushib, 3 ta gol urdi, ammo 25 yoshli futbolchi ijara shartlari tufayli shanba kuni bo‘lib o‘tadigan "Chelsi"ga qarshi derbini o‘tkazib yuboradi.
