"Neftchi" yangi mavsum oldidan tarkibini kuchaytirishda davom etadi. Tarkibga tajribali darvozabon Eldorbek Suyunov kelib qo‘shildi. O‘tgan mavsum Namanganning "Navbahor" jamoasining darvozasi dahlsizligini qo‘riqlagan posbon farg‘onaliklar a’zosiga aylandi. Futbolchi bilan ikki yillik shartnoma imzolandi.

Ma’lumot uchun Eldorbek Suyunov 1991 yil, 12 aprel kuni Qashqadaryo viloyatida tug‘ilgan. Futbolchilik faoliyati davomida “Nasaf” (Qarshi, 2011 – 2017 yilning 1-davrasi), “Paxtakor” (Toshkent, 2017 yilning 2-davrasi - 2023 yillar) jamoalari darvozasini qo‘riqlagan.

O‘zbekistonning 5 karra chempioni (2019, 2020-2023 yillar), shuningdek, milliy chempionatimizning kumush (2011 yil) va bronza (2013-2015, 2016-2017 yillar) medallari sohibi.

Uch marta O‘zbekiston kubogini (2015, 2019 – 2020 yillar)  hamda bir marta OFK kubogini (2011 yil) qo‘lga kiritgan.

2013-2021 yillarda O‘zbekiston milliy terma jamoasi darvozasini 28 ta o‘yinda qo‘riqlagan.

"Eldorbek Suyunovga “Neftchi” jamoasidagi faoliyatida omad yor bo‘lib, jamoamizning g‘alabalariga o‘z xissasini qo‘shishini tilakdoshimiz!" - deyiladi farg‘onaliklarning rasmiy bayonotida.