"Barselona" vingeri Lamin Yamal Ispaniya Superkubogi o‘yinlari uchun butun jamoa bilan Saudiya Arabistoniga uchib ketadi. Bu haqda Diario Sport jurnalisti Toni Xuanmarti xabar berdi.
Eslatib o‘tamiz, 17 yoshli Yamal 2024 yilning dekabr oyi o‘rtalaridan beri jarohati tufayli maydonga tushmayapti.
Manbaga ko‘ra, Yamal "Barselona" bilan Jiddaga yo‘l oladi, biroq u umumiy guruh bilan bir yoki ikkita mashg‘ulot o‘tkazishga vaqt topa oladi xolos. Ta’kidlanishicha, hammasi uning holatiga bog‘liq, chunki na klub, na futbolchining o‘zi tavakkal qilishni xohlamaydi.
Manbaning ta’kidlashicha, Yamal o‘yinlarda qatnashishni va Superkubokda "Barselona"ga yordam berishni xohlaydi, biroq u buni 100 foiz tayyor bo‘lsagina qilish kerakligini tushunadi.
