"Buxoro" futbol klubi qishki transferlar mavsumida iste’dodli futbolchilarni jalb qilish bilan bir qatorda o‘tgan mavsumdagi muvaffaqiyatli tarkibni saqlab qolishga ham katta e’tibor qaratadi.

2024 yilgi mavsumda Pro Liga chempionatida "Buxoro" jamoasining sovrindorlar safidan joy egallashi uchun katta hissa qo‘shgan himoyachilarimiz Frane Ikich va Marko Kolakovich bilan shartnoma yana bir yilga uzaytirildi. Klub rahbariyatining olib borgan muzokaralari natijasida 31 va 32 yoshli futbolchilarimiz kelasi mavsumda ham «Buxoro» sharafini himoya qiladi.

Frane Ikich o‘tgan mavsumda Pro Ligada «Buxoro» safida 25 ta o‘yinda ishtirok etib, 4 ta gol urdi, Marko Kolakovich 26 ta o‘yinda ishtirok etib 7 marta raqib darvozasini ishg‘ol etdi.

Klub rahbariyati Frane Ikichning hamda Marko Kolakovichning tajribasi va mahorati kelasi mavsumda ham yangi marralarni zabt etishda, hal qiluvchi pallalarda ishonchli o‘yin ko‘rsatib, jamoaning g‘alabalari va yutuqlarini mustahkamlashda muhim rol o‘ynashiga ishonch bildiradi.