Kecha — 6 yanvar kuni Assosiasiya va Liga rahbariyati ishtirokida uchrashuv bo‘lib o‘tdi va unda O‘FA texnik direktori Gi Kiala ham ishtirok etdi.
Uchrashuvda Superliga klubi bosh murabbiyi sifatida faoliyat olib boradigan mutaxassislar masalasi ham muhokama qilindi. Sir emaski, bu lavozim uchun Pro lisenziyasi talab etiladi. Ayni vaqtda mazkur lisenziyaga ega mahalliy mutaxassislar sanoqli hisoblanadi.
O‘tgan yilning sentyabr oyida Toshkentda biroz tanaffusdan so‘ng Pro lisenziyasi uchun navbatdagi o‘quv kursi start oldi. Unda 21 nafar mutaxassis tahsil olayotgan bo‘lib, shundan 17 nafari mahalliy murabbiylar hisobalanadi. Bu o‘z-o‘zidan joriy mavsum so‘ngida Pro lisenziyasiga ega o‘zbekistonlik mutaxassislar soni yana bir necha nafarga ko‘proq bo‘lishini anglatadi.
Yanvar oyidan e’tiboran professional futbol klubi maqomini olish uchun da’vogar klublar OFK lisenziyalashidan o‘tishni boshladi. Bunda ular OFK platformasiga Pro lisenziyasiga ega shaxsni bosh murabbiy sifatida yuklashi lozim. Kechagi uchrashuvda OFK talabi muhokama qilindi va 2025 yilda Pro kursiga tahsil olayotgan mutaxassislarga Superliga yoki Proliga klubi bosh murabbiyi sifatida Liga ro‘yxatidan o‘tishga ruxsat berildi. Bu o‘z navbatida futbol klublarida tanlov imkoniyatini oshiradi.
