Кеча — 6 январь куни Ассоциация ва Лига раҳбарияти иштирокида учрашув бўлиб ўтди ва унда ЎФА техник директори Ги Киала ҳам иштирок этди.

Учрашувда Суперлига клуби бош мураббийи сифатида фаолият олиб борадиган мутахассислар масаласи ҳам муҳокама қилинди. Сир эмаски, бу лавозим учун Про лицензияси талаб этилади. Айни вақтда мазкур лицензияга эга маҳаллий мутахассислар саноқли ҳисобланади.

Ўтган йилнинг сентябрь ойида Тошкентда бироз танаффусдан сўнг Про лицензияси учун навбатдаги ўқув курси старт олди. Унда 21 нафар мутахассис таҳсил олаётган бўлиб, шундан 17 нафари маҳаллий мураббийлар ҳисобаланади. Бу ўз-ўзидан жорий мавсум сўнгида Про лицензиясига эга ўзбекистонлик мутахассислар сони яна бир неча нафарга кўпроқ бўлишини англатади.

Январь ойидан эътиборан профессионал футбол клуби мақомини олиш учун даъвогар клублар ОФК лицензиялашидан ўтишни бошлади. Бунда улар ОФК платформасига Про лицензиясига эга шахсни бош мураббий сифатида юклаши лозим. Кечаги учрашувда ОФК талаби муҳокама қилинди ва 2025 йилда Про курсига таҳсил олаётган мутахассисларга Суперлига ёки Пролига клуби бош мураббийи сифатида Лига рўйхатидан ўтишга рухсат берилди. Бу ўз навбатида футбол клубларида танлов имкониятини оширади.