Agar Fransiyaning "PSJ" klubi "Napoli" vingeri Xvicha Kvarasxeliyani 80 million yevroga sotib olsa, Qozonning "Rubin" klubi birdamlik uchun 1,2 million yevro oladi, deya xabar beradi Transfermarkt portali. Parijliklarning bu taklifi haqida avvalroq jurnalist Fabrisio Romano ijtimoiy tarmog‘ida xabar bergan edi.

Shuningdek, bunday transfer amalga oshirilsa, "Rustavi" 400 ming yevro, "Dinamo" (Batumi) esa 1,6 million yevro oladi.

Eslatib o‘tamiz, Xvicha 2019 yilning iyulidan 2022 yilning martigacha "Rubin" safida o‘ynagan.

Italiya chempionatining joriy mavsumida 23 yoshli Kvarasxeliya 17 ta o‘yin o‘tkazib, 5 ta gol urdi va 3 ta golli uzatmani amalga oshirdi. Italiya kubogida ham bitta o‘yin o‘tkazdi. Futbolchining klub bilan amaldagi mehnat shartnomasi 2027 yilning yoziga qadar tuzilgan. Transfermarkt portalida berilgan ma’lumotlarga ko‘ra, futbolchining bozor qiymati 85 million yevroni tashkil qiladi.