Агар Франциянинг "ПСЖ" клуби "Наполи" вингери Хвича Кварацхелияни 80 миллион еврога сотиб олса, Қозоннинг "Рубин" клуби бирдамлик учун 1,2 миллион евро олади, дея хабар беради Transfermarkt портали. Парижликларнинг бу таклифи ҳақида аввалроқ журналист Фабрицио Романо ижтимоий тармоғида хабар берган эди.

Шунингдек, бундай трансфер амалга оширилса, "Рустави" 400 минг евро, "Динамо" (Батуми) эса 1,6 миллион евро олади.

Эслатиб ўтамиз, Хвича 2019 йилнинг июлидан 2022 йилнинг мартигача "Рубин" сафида ўйнаган.

Италия чемпионатининг жорий мавсумида 23 ёшли Кварацхелия 17 та ўйин ўтказиб, 5 та гол урди ва 3 та голли узатмани амалга оширди. Италия кубогида ҳам битта ўйин ўтказди. Футболчининг клуб билан амалдаги меҳнат шартномаси 2027 йилнинг ёзига қадар тузилган. Transfermarkt порталида берилган маълумотларга кўра, футболчининг бозор қиймати 85 миллион еврони ташкил қилади.