Kilian Mbappe "Real"dagi o‘yinlari uchun juda ko‘p tanqidlarga uchradi. “Arsenal” va Fransiya terma jamoasi afsonasi Tyerri Anri ham “Los-Blankos” hujumchisining o‘yinlarini diqqat bilan kuzatib bormoqda. RMC Sport nashriga bergan intervyusida u Mbappe hozir to‘g‘ri yo‘lda ekanini ta’kidladi.
"Gollar borasida uning "Real"dagi boshlanishi yomon bo‘ldi deb ayta olmaysiz. Endi uning butun mavsum davomidagi harakatlai va o‘yin uslubi odamlarda ko‘p savollar tug‘diradi.
Darvozaga teskari o‘ynashni o‘rganish uchun vaqt kerak, lekin siz o‘rganasiz. Buni aytishim mumkin, chunki boshida men ham buni qila olmadim. Taraqqiyot bo‘lishi kerak va Kilian bunga qodir", dedi Tyerri Anri.
Joriy mavsumda Kilian Mbappe 27 ta o‘yinda maydonga tushib, 14 ta gol urdi va 3 ta golga assistentlik qildi.
