Alexandro Garnacho "Napoli"ga o‘tishga rozi edi.
La Gazzetta dello Sport xabariga ko‘ra, dushanba kuni Italiya klubi rahbariyati vakillari Barselonada "Manchester Yunayted" vingeri agentlari bilan uchrashuv o‘tkazishgan. "Napoli" sport direktori Jovanni Manna va bosh murabbiy Antonio Konte Garnachoni qadrlashadi, argentinalik futbolchining o‘zi ham bu kelishuvga qarshi emas.
Qayd etilishicha, neapolliklar futbolchining maoshi talabini qondira oladi – uning "Manchester Yunayted"dagi daromadi, avvalroq xabar qilinganidek, "PSJ"ga o‘tishga yaqin turgan Xvicha Kvarasxeliyaning maoshiga teng.
Shu bilan birga, Garnachoning "Napoli"ga o‘tishiga "Manchester Yunayted"ning moliyaviy talablari to‘sqinlik qilishi mumkin – mankunianliklar vinger uchun 80 million yevro atrofida pul talab qilishmoqda. Neapolliklar bu summani juda yuqori deb hisoblashmoqda va bonuslar bilan birga bor-yo‘g‘i 45 million yevro taklif qilishga tayyor.
Jurnalist Janluka Di Marsioning xabar berishicha, "Napoli" Garnachoga muqobil sifatida huquqlari "RB Leypsig"ga tegishli bo‘lgan Timo Vernerni ijaraga olish variantini ko‘rib chiqmoqda.
