Алехандро Гарначо "Наполи"га ўтишга рози эди.
La Gazzetta dello Sport хабарига кўра, душанба куни Италия клуби раҳбарияти вакиллари Барселонада "Манчестер Юнайтед" вингери агентлари билан учрашув ўтказишган. "Наполи" спорт директори Жованни Манна ва бош мураббий Антонио Конте Гарначони қадрлашади, аргентиналик футболчининг ўзи ҳам бу келишувга қарши эмас.
Қайд этилишича, неаполликлар футболчининг маоши талабини қондира олади – унинг "Манчестер Юнайтед"даги даромади, аввалроқ хабар қилинганидек, "ПСЖ"га ўтишга яқин турган Хвича Кварацхелиянинг маошига тенг.
Шу билан бирга, Гарначонинг "Наполи"га ўтишига "Манчестер Юнайтед"нинг молиявий талаблари тўсқинлик қилиши мумкин – манкунианликлар вингер учун 80 миллион евро атрофида пул талаб қилишмоқда. Неаполликлар бу суммани жуда юқори деб ҳисоблашмоқда ва бонуслар билан бирга бор-йўғи 45 миллион евро таклиф қилишга тайёр.
Журналист Жанлука Ди Марционинг хабар беришича, "Наполи" Гарначога муқобил сифатида ҳуқуқлари "РБ Лейпциг"га тегишли бўлган Тимо Вернерни ижарага олиш вариантини кўриб чиқмоқда.
