Eduardo Kamavinga jarohati sabab bir necha hafta maydonga tusha olmaydi.
Madridning “Real” klubi yarim himoyachisi Ispaniya kubogining 1/8 finali doirasidagi “Selta”ga qarshi o‘yinda (qo‘shimcha vaqt 5:2) jarohat oldi.

Radio Marca muxbiri Xose Luis Sanchesning xabar berishicha, futbolchi qo‘shimcha taymlarda biroz noqulaylikni sezgan. Murabbiylar shtabi Eduardodan sabrli bo‘lishni so‘radi, natijada u o‘yinni jarohat bilan yakunladi.

Keyinroq klub tibbiy xizmati Kamavingaga chap son mushaklari jarohati tashxisi qo‘yilgani haqida xabar berdi.

Marca xabariga ko‘ra, fransiyalik futbolchi uch haftani o‘tkazib yuborishi mumkin. Uning qaytishi La Liganing 9-fevral kuni “Atletiko”ga qarshi o‘yiniga to‘g‘ri kelishi mumkin.

Joriy mavsumda Kamavinga Ispaniya chempionatida 8 ta o‘yin o‘tkazib, 2 ta golli uzatmani amalga oshirdi.