Futzal bo‘yicha ayollar terma jamoamiz Osiyo chempionati saralash bosqich «S» guruhi 4-turida Avstraliya termasiga qarshi teng kurashlar ostida o‘tgan uchrashuvda imkoniyatni boy berdi.

Xo‘sh, mazkur turdan keyin guruhda vaziyat qanday?

O‘zbekiston manziliga yetib keldi, deguvchilar shoshilmang, manzilimiz Xitoyda o‘tadigan final bosqichi. Avstraliya terma jamoasi ko‘pchilik mutaxassislar nazdida ham guruh favoritlaridan biri edi. Demak, so‘nggi turda avstraliyaliklarning filippinliklardan ustun kelishiga ko‘pchilikda shubha yo‘q. O‘z navbatida, qizlarimizning qo‘shni Turkmaniston termasi ustidan g‘alaba qozonishiga ham barcha birdek ishonmoqda. So‘nggi turdan keyin to‘plar nisbatiga ko‘ra, guruhda ikkinchi o‘rinni egallashimizga ham umid bor.

Agarda voqealar rivoji boshqacharoq tus olib, Filippin so‘nggi turda ochko ola bilgan taqdirda ham, bizning imkoniyatimiz yo‘qqa chiqmaydi - eng yaxshi uchinchi o‘rin ham Osiyo Kubogi final bosqichiga yo‘llanmaga ega chiqishini unutmaylik.

Shunday ekan, barchasi oxirgi turda hali bo‘ladi. Hozir esa termamizning keyingi o‘yindagi g‘alabasiga, umuman olganda, keyingi faoliyatiga muvaffaqiyat tilaylik.