Футзал бўйича аёллар терма жамоамиз Осиё чемпионати саралаш босқич «С» гуруҳи 4-турида Австралия термасига қарши тенг курашлар остида ўтган учрашувда имкониятни бой берди.

Хўш, мазкур турдан кейин гуруҳда вазият қандай?

Ўзбекистон манзилига етиб келди, дегувчилар шошилманг, манзилимиз Хитойда ўтадиган финал босқичи. Австралия терма жамоаси кўпчилик мутахассислар наздида ҳам гуруҳ фаворитларидан бири эди. Демак, сўнгги турда австралияликларнинг филиппинликлардан устун келишига кўпчиликда шубҳа йўқ. Ўз навбатида, қизларимизнинг қўшни Туркманистон термаси устидан ғалаба қозонишига ҳам барча бирдек ишонмоқда. Сўнгги турдан кейин тўплар нисбатига кўра, гуруҳда иккинчи ўринни эгаллашимизга ҳам умид бор.

Агарда воқеалар ривожи бошқачароқ тус олиб, Филиппин сўнгги турда очко ола билган тақдирда ҳам, бизнинг имкониятимиз йўққа чиқмайди - энг яхши учинчи ўрин ҳам Осиё Кубоги финал босқичига йўлланмага эга чиқишини унутмайлик.

Шундай экан, барчаси охирги турда ҳали бўлади. Ҳозир эса термамизнинг кейинги ўйиндаги ғалабасига, умуман олганда, кейинги фаолиятига муваффақият тилайлик.