Boliviya futbolida navbatdagi g‘aroyibot. Jamoalardan biri kerakli natijani saqlab qolish uchun hakamning final hushtagi yangramasidan oldin chetga chiqib ketganiga nima deysiz? Diqqat qiling, bunday kulguli holat qandaydir havaskorlar o‘rtasidagi uchrashuv yoki oddiyroq bahsda emas, Boliviya chempionati tizimidagi Oliy ligaga yo‘llanma beruvchi to‘qnashuvda kuzatildi. Ajabo...

Boliviya futboli shunaqa. Bu safar mamlakatda elit ligaga chiqish uchun kurash chinakamiga qiziqarli tus oldi. «Pley-off» bosqichining ilk o‘yinini o‘z maydonida «Real Oruro»ga qarshi o‘tkazib, 4:0 hisobida g‘alaba qozongan «Royal Pari» safarga xotirjam holda bordi. Biroq javob uchrashuvi jamoa uchun omadsiz kechdi. Xullas,  «Royal Pari» 0:3 hisobida ortda qolayotgan pallada, o‘yinning so‘nggi daqiqalarida uning darvozasi tomon penalti belgilandi. Ayni shu onda jamoa bosh murabbiyi hakamlikka e’tiroz o‘laroq, shogirdlarini maydondan olib chiqib ketdi. Vaholanki, bu vaqtda ham umumiy hisob «Royal Pari» foydasiga 4:3 edi. Ehtimol, mehmonlar erta chiqib ketish asnosida ijobiy natijani saqlab qolishni ham o‘ylagandirlar. Chunonchi, avvaliga vaziyatga polisiya aralashuvi ham hech qanday natija keltirgani yo‘q. Ya’ni jamoa o‘yinni yakunlab qo‘yish taklifini qat’iy ohangda rad etdi.

Eng qizig‘i, Boliviya futbol federasiyasi rasmiy vakillari bunday holatda klub Tartib-intizom kodeksiga binoan jazolanishi, yuqori divizion yo‘llanmasi esa hisobga qaramay, «Real Oruro»ga berilishini tushuntirishgach, mehmonlar birdan qat’iyatni yig‘ishtirib qo‘yib,  maydonga qaytishdi. Ammo kech bo‘lgandi. Chunonchi, bu orada hakamlar brigadasi rasman tugamagan o‘yin jamoalardan birining bosh tortishi tufayli davom ettirilmasligi haqida bayonot to‘ldirishga ulgurgan va 20 nafar polisiyachi qurshovida maydondan chiqib ketgandi...