UFC 311 turniri yakuniga ko‘ra, sportchilarning gonorarlari miqdori e’lon qilindi. Unga ko‘ra, o‘zbekistonlik MMA jangchisi Guskov umumiy hisobda 86 ming dollarga ega chiqdi.

U jangdagi ishtiroki uchun 43 ming, g‘alaba uchun yana 43 ming dollar pul oldi. Uning raqibi Elekana esa 16 ming dollarga ega bo‘ldi.

Turnirdagi eng ko‘p gonorarni Islam Maxachev ishlab oldi. U umumiy hisobda 3,6 million dollar gonorar olgan. Rossiyalik sportchi jangda ishtirok etgani uchun 1 million, g‘alaba uchun 100 ming, homiylardan 42 ming, pulli translyasiyalardan 2,5 million ishlab topgan.

Renato Moykano esa Sarukyanning o‘rniga jang qilishga rozilik bergani uchun 1,5 million dollarga boyidi. U jangdagi ishtirok uchun 500 ming, homiylardan 32 ming, translyasiyalar orqali esa 850 ming dollar oldi.

Yana bir markaziy jang ishtirokchilari Merab Dvalishvili umumiy hisobda 2,2 million, Umar Nurmagomedov 1,13 million dollarga ega chiqdi.

MMA ustasi Bogdan Guskov turnirda amerikalik 29 yoshli Billi Elekanga qarshi o‘tkazdi.

Bahsning ikkinchi raundida Bogdanning bo‘g‘ish usuli tufayli Elekana jangni davom ettira olmadi va o‘zbekistonlik sportchi g‘alaba qozondi.