“Katta Dubulg‘a” turnirlarining 24 karra g‘olibi, serbiyalik tennischi Novak Jokovich 2025 yilgi Australian Open musobaqasining yarim finaliga chiqdi.
Murosasiz kechgan chorak final uchrashuvida u 4 karra Grand Slam turniri g‘olibi, ispaniyalik tennischi Karlos Alkarasni 4:6, 6:4, 6:3, 6:4 hisobida yengdi. Uchrashuv 3 soat 35 daqiqa davom etdi.
Mag‘lubiyatdan so‘ng Alkaras uchrashuv haqida fikr bildirdi.
“Biz har doim bir-birimiz bilan yaxshi uchrashuvlar o‘tkazamiz. Bir-birimizni qiyin ahvolga solib qo‘yamiz. Shunday tennischi bilan o‘ynash tajribasiga ega bo‘layotganimdan xursandman. Men 21 yoshdaman. Uchrashuvlardan ko‘p narsalarni o‘rganmoqdaman. Tennisda ko‘p narsaga erishdim, lekin tarixdagi eng yaxshi o‘yinchilardan biri bilan uchrashish menga yaxshiroq bo‘lishga yordam bermoqda. Avstraliyadan faxr bilan boshimni baland tutib ketaman”, dedi Jahonning hozirda 3-raqamli tennischisi Alkaras matbuot anjumanida.
Australian Open turniri finaliga chiqish uchun Novak Jokovich Jahonning ikkinchi raqamli tennischisi Aleksandr Zverevga qarshi o‘ynaydi. Bu Jokovich uchun Australia Open’dagi 12-yarim final bo‘ladi.
