“Катта Дубулға” турнирларининг 24 карра ғолиби, сербиялик теннисчи Новак Жокович 2025 йилги Australian Оpen мусобақасининг ярим финалига чиқди.

Муросасиз кечган чорак финал учрашувида у 4 карра Grand Slam турнири ғолиби, испаниялик теннисчи Карлос Алькарасни 4:6, 6:4, 6:3, 6:4 ҳисобида енгди. Учрашув 3 соат 35 дақиқа давом этди.

Мағлубиятдан сўнг Алькарас учрашув ҳақида фикр билдирди.

“Биз ҳар доим бир-биримиз билан яхши учрашувлар ўтказамиз. Бир-биримизни қийин аҳволга солиб қўямиз. Шундай теннисчи билан ўйнаш тажрибасига эга бўлаётганимдан хурсандман. Мен 21 ёшдаман. Учрашувлардан кўп нарсаларни ўрганмоқдаман. Теннисда кўп нарсага эришдим, лекин тарихдаги энг яхши ўйинчилардан бири билан учрашиш менга яхшироқ бўлишга ёрдам бермоқда. Австралиядан фахр билан бошимни баланд тутиб кетаман”, деди Жаҳоннинг ҳозирда 3-рақамли теннисчиси Алькарас матбуот анжуманида.

Australian Оpen турнири финалига чиқиш учун Новак Жокович Жаҳоннинг иккинчи рақамли теннисчиси Александр Зверевга қарши ўйнайди. Бу Жокович учун Australia Open’даги 12-ярим финал бўлади.