"Manchester Siti" va Angliya terma jamoasi yarim himoyachisi Filipp Foden yaqin kelajakda boshqa jamoaga o‘tish haqida o‘ylamasligini aytdi. "Manchester Siti" futbolchisining so‘zlariga ko‘ra, u o‘zini boshqa joyda tasavvur qila olmaydi.
"Men boshqa hech narsa qidirmayapman. Men juda yoshligimdan bu yerdaman va bu yerda o‘zimni qulay his qilyapman. Men o‘zimni boshqa joyda ko‘ra olmayman. Kelajakda nima bo‘lishini hech qachon bilmaysiz, lekin men shu yerda ekanligimdan xursandman", - dedi Foden Evening News bilan suhbatda.
24 yoshli Foden "Manchester Siti" tarbiyalanuvchisi hisoblanadi. Joriy mavsumda angliyalik futbolchi barcha turnirlarda 27 ta o‘yin o‘tkazib, 10 ta gol urdi va 4 ta golli uzatmani amalga oshirdi. Transfermarkt portali Fodenning bozor qiymatini 140 million yevroga baholagan.
