"Манчестер Сити" ва Англия терма жамоаси ярим ҳимоячиси Филипп Фоден яқин келажакда бошқа жамоага ўтиш ҳақида ўйламаслигини айтди. "Манчестер Сити" футболчисининг сўзларига кўра, у ўзини бошқа жойда тасаввур қила олмайди.
"Мен бошқа ҳеч нарса қидирмаяпман. Мен жуда ёшлигимдан бу ердаман ва бу ерда ўзимни қулай ҳис қиляпман. Мен ўзимни бошқа жойда кўра олмайман. Келажакда нима бўлишини ҳеч қачон билмайсиз, лекин мен шу ерда эканлигимдан хурсандман", - деди Фоден Evening News билан суҳбатда.
24 ёшли Фоден "Манчестер Сити" тарбияланувчиси ҳисобланади. Жорий мавсумда англиялик футболчи барча турнирларда 27 та ўйин ўтказиб, 10 та гол урди ва 4 та голли узатмани амалга оширди. Transfermarkt портали Фоденнинг бозор қийматини 140 миллион еврога баҳолаган.
