Niderlandiyaning Veyk-an-Zee shahrida shaxmat bo‘yicha davom etayotgan “Tata Steel Chess-2025” turnirining ortda qolgan 11-tur bahslarida “Masters” guruhida yetakchilikka da’vogar bo‘lgan Gukesh va Abdusattorov durangga erishgan bo‘lsa, Rameshbabu Praggnanandxa g‘alabaga erishdi.
Ushbu turda Nodirbek Abdusattorov qora donalarda germaniyalik Vinsent Keymer bilan kuch sinashdi. Nodirbek qora donalarda harakatlangan bo‘lsa-da, g‘alabaga yaqin keldi. Biroq, 38-yurish holatidagi xatolik va bundan unumli foydalangan germaniyalik shaxmatchi hamyurtimizning ustunlikka ega bo‘lishiga yo‘l qo‘ymadi. Natijada o‘yinda murosa yo‘li tanlandi.
11-turda “Masters” guruhida peshqadamlik qilayotgan hindistonlik Gukesh Dommaraju oq donalarda xitoylik Vey Iga qarshi dona surdi. 30-yurish vaziyatida durang natida qayd etilishi amaldagi jahon chempioni Gukeshning yaqqol yetakchilik shiddatini biroz pasaytirdi.
Abdusattorovdan keyingi pog‘onani band etgan Rameshbabu Praggnanandxa mazkur turda qora donalarda AQSHlik Fabiano Karuana bilan bahs olib borishiga qaramasdan g‘alabaga erishdi.
Bugun o‘tkaziladigan 12-tur ostonasida Gukesh hisobida 8 ochko mavjud bo‘lsa, keyingi pog‘onada borayotgan Abdusattorov va Praggnanandxa 7,5 ochkoga ega bo‘lib turibdi. Ulardan keyingi qatorlarda o‘rin egallagan Vey I, Anish Giri va Vladimir Fedoseev 6 ochkoga egalik qilishgan.
“Tata Steel Chess-2025”ning yakunlanishiga 2 ta tur qolganda yetakchilar va da’vogarlarning ochkolaridagi farqidan ham ko‘rinib turibdiki, g‘oliblik aynan 3 nafar shaxmatchi o‘rtasida kechadi. Ammo, so‘nggi turlarda turnir davomida hali mag‘lubiyatga uchramagan 3 nafar shaxmatchidan biri xitoylik Vey ekanini, u oxirgi o‘yinlarni Giri va Fedoseev bilan o‘tkazishini nazarda tutsak, chin yurti vakili yetakchilar qatoridan o‘rin egallash imkoniyati saqlanib turibdi.
Biroq, peshqadamlar qatorida borayotgan qaysi shaxmatchi Veyga o‘rnini bo‘shatib beradi? Bu savolga javobni oldindagi o‘yinlar natijasi orqali bilib olamiz.
Bugun, 1 fevral kuni o‘tadigan 12-turda Nodirbek Abdusattorov qora donalarda 3,5 ochko bilan 13-o‘rindan joy olgan hindistonlik Arjun Erigaisi bilan bahslashadi. Turnir peshqadami Gukesh mazkur turda qora donalarda niderlandiyalik Yorden van Forest bilan, Praggnanandxa oq donalarda serbiyalik Aleksey Sarana bilan kuch sinashadi.
“Chellenjer“ guruhida qatnashayotgan hamyurtimiz Nodirbek Yoqubboyev 11-turda qora donalarda argentinalik Faustino Oroni mag‘lub etdi va ochkolari sonini 6 taga yetkazib, qo‘shimcha ko‘rsatkichlar evaziga 6-o‘ringa ko‘tarilib oldi.
Bugun o‘tadigan 12-turda Yoqubboyev oq donalarda niderlandiyalik Artur Peypers qarshiligini yengishga harakat qiladi. Aytish lozim, Nodirbek Yoqubboyevning bugungi raqibi 5 ochko bilan 11-qatorda bormoqda.
Ertaga musobaqaning so‘nggi 13-turida Nodirbek Abdusattorov hindistonlik Pentala Xarikrishna bilan ro‘baro‘ kelsa, Nodirbek Yoqubboyev xitoylik Lu Myaoi bilan bahs olib boradi.
