Angliya Kubogining 4-raundidan o‘rin olgan uchrashuvda “Leyton Orient” “Manchester Siti”ni 8 fevral, shanba kuni qabul qildi. Ushbu uchrashuvda “shaharliklar” 1:2 hisobida g‘alaba qozondi.
Uchrashuvning 19-daqiqasida “Leyton” futbolchisi 40 metr uzoqlikdan zarba yo‘lladi. To‘p Stefan Ortegaga tegib darvozaga yo‘l oldi. Bo‘lim shu hisobda yakunlandi.
Ikkinchi bo‘limning boshida Abduqodir Husanov maydonga tushdi. U yosh Vitor Reysni almashtirdi. 56-daqiqada Riko Lyuiz tepgan to‘p o‘zbekistonlik futbolchiga tegib darvozaga yo‘l oldi. Gol Husanov nomiga yozildi. Keyinchalik 79-daqiqada De Bryuyne gol urib, jamoasi uchun muhim g‘alabani olib keldi.
Sofascore nashri bahsda ishtirok etgan futbolchilar uchun qo‘yilgan baholarni e’lon qildi. Zaxiradan maydonga tushib muhim pallada gol urgan Abduqodir Husanov 7,8 ballga loyiq ko‘rildi. Shaharliklar tarkibida dastlabki daqiqalardan harakat qilgan Grilish eng yuqori ball oldi — 8,5 va o‘yindagi eng yuqori baholangan o‘yinchi bo‘ldi. Hujumda harakat qilgan Marmushning harakatlarida samaradorlik sezilmadi — 6.1 ball.
Mezbonlar tarkibida eng yuqori bahoga darvozabon Kili mualliflik qildi. U “shaharliklar” tepgan aniq zarbalarning bir nechtasini qaytardi. Chap qanot yarim himoyasida o‘ynagan Jayesimining o‘yini qovushmadi — 6,2 ball.
“Shaharliklar” keyingi o‘yinni 11 fevral kuni Chempionlar Ligasi doirasida “Real”ga qarshi o‘tkazadi.
