"Inter Mayami" va Argentina terma jamoasi yulduz hujumchisi Lionel Messining shaxsiy tansoqchisi Yassin Chueko ijtimoiy tarmoqda post e’lon qildi. U maydonga chiqqan muxlis uni yiqitib yuborgan virusli videoga javoban izoh qoldirdi. Chueko muxlisni Messiga yetib borishidan to‘sishga uringan edi.

«Gonduras va Perudagi stadion xavfsizlik xizmatlari xodimlariga ularning professionalizmi va yordami uchun chin qalbimdan minnatdorlik bildirmoqchiman. Bu men uchun haqiqatan ham bebaho bo‘ldi.

Muxlislarni ushlash mening vazifam emas. Bu stadion xavfsizlik xodimlarining majburiyati. Ammo rostini aytsak, ularning aksariyati— men bu yerda “aksariyat” so‘zini ishlatyapman, umumlashtirmasdan — o‘z vazifasiga to‘liq e’tibor qaratmaydi. Ular xavfsizlikni ta’minlash o‘rniga o‘yinni tomosha qilish yoki surat va video olish bilan band. Ular e’tiborsizlik qilgani uchun, bunday holatlarda o‘z tashabbusim bilan aralashib, vaziyatni hal qilishga qaror qildim.

Hurmatli xavfsizlik xodimlari, sizlarni chin dildan va jiddiy ravishda iltimos qilaman: hushyor bo‘ling! Sizga topshirilgan ishni qiling! Stadion, o‘yinchilar va muxlislar xavfsizligi sizga bog‘liq. Men har doim yoningizda bo‘laman, zarurat tug‘ilganda aralashishga tayyorman. Ammo agar siz o‘z vazifangizni bajarmasangiz, menga bu missiyani yolg‘iz uddalash juda qiyin bo‘ladi.

Men mashhur odam emasman, mening egom yo‘q. Ayrim ommaviy axborot vositalari da’vo qilganidek, men yiliga 3 million dollar ishlamayman. Men millionlab boshqa ishchilar kabi oddiy mehnatkashman, kundalik vazifalarimni mas’uliyat va faxr bilan bajarish uchun qo‘limdan kelganini qilaman. Mening vazifam – men ishlaydigan odamlarning xavfsizligini ta’minlash va hech bir muxlisga ziyon yetkazmaslikdir. Va bunga erishish uchun qo‘limdan kelgan barcha narsani qilishga tayyorman.

Men maydon bo‘ylab krossovkada yugurishga tayyorman. Minglab odamlar oldida yuzim bilan yiqilishga ham. Agar zarur bo‘lsa, yiqitilishga va tahqirlanishga ham. Buning hech biri men uchun ahamiyatga ega emas. Chunki mening imijim muhim emas – faqatgina missiyam muhim. Va agar bir kun kelib o‘z burchimni bajarish uchun hayotimni berishimga to‘g‘ri kelsa, men bunga hech qanday ikkilanishsiz tayyorman», – deb yozdi Chueko o‘z ijtimoiy tarmoqdagi sahifasida.

Chueko AQSH armiyasining sobiq "spesnazi" bo‘lib, Iroq va Afg‘onistonda harbiy tajriba orttirgan, jang san’atlarini yaxshi o‘zlashtirgan va bir necha marta MMA janglarida qatnashgan.