Madridning “Real” klubi Ispaniya chempionatining 8-turidan o‘rin olgan bahsda “Vilyarreal”ni mag‘lub etdi. “Qirollik klubi” ustozi Joze Mourinyo o‘yindan so‘ng jurnalistlar bilan muloqot qilishdan bosh tortdi.

Madridning “Real” klubi bosh murabbiyi Joze Mourinyo Ispaniya chempionatining 8-turidan o‘rin olgan “Vilyarreal”ga qarshi o‘yindan so‘ng jurnalistlar bilan muloqot qilishdan bosh tortdi. Bunga diskvalifikasiyaga uchrashdan xavfsiragani sabab bo‘lgan.

10 oktyabr, shanba kuni “Real” o‘z maydonida “Vilyarreal”ni 1:0 hisobida mag‘lub etdi. Uchrashuvning 71-daqiqasida madridliklar hujumchisi Vinisius Junior raqib darvozasiga jamoasining o‘yindagi ikkinchi to‘pni kiritgan edi. Biroq videotakror (VAR) ko‘rib chiqilgach, hujum vaqtida braziliyalik futbolchi raqibining sochidan tortgani ma’lum bo‘ldi va gol bekor qilindi. 73-daqiqada esa hujumchi to‘g‘ridan to‘g‘ri qizil kartochka olib, maydonni tark etdi. O‘yindan so‘ng “Real” ustozi matbuot anjumaniga kelmadi.

Hech qanday fikr bildirmayman, chunki “Sevilya” va “Barselona”ga qarshi o‘yinlarda murabbiylar o‘rindig‘ida bo‘lishni xohlayman, deya Mourinyoning so‘zlarini keltiradi Marca nashri.

Ma’lumot o‘rnida, “Vilyarreal” ustidan qozonilgan g‘alabadan so‘ng, “Real” ochkolari sonini 18 taga yetkazib, Ispaniya La Ligasida 3-o‘rinni egallab turibdi. Jamoa peshqadam “Barselona”dan 6 ochkoga ortda qolmoqda.