O‘zbekiston U-20 terma jamoasi futbolchisi Ollobergan Karimov Yamanga qarshi o‘tgan uchrashuv hamda keyingi o‘yinlar haqida o‘z fikrlarini bildirib o‘tdi.

— Yamanga qarshi ilk uchrashuv haqida nima deya olasiz?

— Birinchi turda oson bo‘lmagan o‘yinda qatnashib, g‘alaba qozondik. Birinchi bo‘lim to‘liqligicha bizning nazoratimiz ostida o‘tdi. Gol kiritishga erishdik, vaziyatlar yarata oldik. Ikkinchi bo‘limni ham yaxshi boshladik, lekin oxirgi daqiqalarda raqibimizda ham imkoniyatlar bo‘ldi. Chunki raqib ham musobaqaga yaxshi tayyorgarlik ko‘rgan va ular ham g‘alaba uchun kurashishga harakat qilib ko‘rishdi. Biz uchrashuvda g‘alaba qozondik, bundan xursandmiz. Biroq xatolarimiz ustida ishlab, o‘yinimizni yaxshilash ustida harakat qilamiz.

— Indoneziya va Eronga qarshi o‘tadigan keyingi uchrashuvlar haqida

— Indoneziya bilan Eron o‘zaro o‘yinda ham bir biriga qarshi munosib o‘yin ko‘rsatishdi. Eron o‘z imkoniyatlaridan foydalanib, 3 ochkoni qo‘lga kiritdi. Ular bilan avval ham o‘ynaganmiz. Bu ikkita uchrashuvda ham g‘alaba qozonib, o‘zbekistonlik muxlislarni xursand qilamiz degan umiddaman.

— Siz 17 yoshlilar o‘rtasidagi Osiyo kubogida ham ishtirok etgansiz. Bugungi kunda U-20 safida ham harakat qilyapsiz. Har ikki turnirning o‘xshashliklari va farqlari qanday?

— Ikkala yosh toifasidagi musobaqa ham o‘ziga yarasha qiziq va murakkab. Boshqa jamoalarda ham biz singari U-17 da to‘p tepib, hozirda U-20 jamoasi safidan o‘rin olgan futbolchilarni ko‘ryapmiz. Chempionat yuqori saviyada va unda kuchli jamoalar ishtirok etmoqda.