17-18 fevral kunlari futbol bo‘yicha Osiyo Elit chempionlar ligasi umumiy bosqichining 8-tur o‘yinlari bo‘lib o‘tadi.
Mazkur turda “Paxtakor” – “As-Sadd”, “Ash-SHorta” – “Al-Ayn”, “Persepolis” – “An-Nasr”, “Al-Ahli” – “Al-Garafa”, “Ar-Rayyan” – “Istiqlol”, “Al-Hilol” – “Al-Vasl” klublari o‘zaro raqobatlashadi.
8-turning biz uchun ahamiyatli o‘yini, albatta, “Paxtakor” – “As-Sadd” uchrashuvidir. Shuningdek, “Persepolis” – “An-Nasr” va “Ar-Rayyan” – “Istiqlol” klublari o‘rtasidagi bahslar natijasi ham jamoamizning keyingi taqdirida muhim ahamiyat kasb etadi.
Aniqroq aytadigan bo‘lsak, 7-tur yakunidan so‘ng “Paxtakor” 4 ochko bilan 10-o‘ringa joylashgan bo‘lsa, “Istiqlol” va “Persepolis” jamoalari 6 tadan ochko jamg‘argan holda 8-9-o‘rinlarda bormoqda. Shu sababli, poytaxtimiz klubi 8-turda “As-Sadd”ni yenga olsa, shu qatorda “Persepolis” va “Istiqlol” klublari mag‘lubiyatga uchrasa, “sherlar“ sakkizinchi o‘rindan joy olishi hamda navbatdagi bosqichga o‘tishi mumkin.
Shu o‘rinda, “Paxtakor” – “As-Sadd” jamoalari bahsiga oid ayrim faktlarni e’tiboringizga havola qilishni lozim topdik. Ushbu jamoalar 2011 va 2019 yillarda OCHL musobaqasining guruh bosqichida o‘zaro o‘yin o‘tkazgan. Dohada mezbonlar har ikki o‘yinda 2:1 hisobida zafar quchgan bo‘lsa, Toshkentdagi bahslar 1:1 va 2:2 hisobida yakunlangan. Umid qilamizki, bugun mahalliy vaqt bilan soat 19:00 da o‘tadigan bahsda jamoamiz muxlislarimiz uzoq kutgan muhim g‘alabani qo‘lga kiritadi.
Ma’lumot o‘rnida: Osiyo Elit chempionlar ligasining 7-tur yakuniga ko‘ra “Al-Hilol” va “Al-Ahli” klublari ochkolarini 19 taga yetkazib olgan holda gollar nisbatiga ko‘ra, 1- va 2- pog‘onadan joy olgan.
Shuningdek, “An-Nasr” jamoasi 16 ochko bilan uchinchi o‘rinni egallab turibdi. “As-Sadd” 12, “Al-Vasl” 11, “Ar-Rayyan” 8, “Al-Garafa” 7, “Istiqlol” 6 ochko jamg‘arib, kuchli 8 talikka yakun yasab berdi. Garchi “Persepolis”da ham 6 ochko bo‘lsa-da, gollar nisbatiga ko‘ra ushbu jamoa 9-o‘rinda qoldi. “Paxtakor” 4 ochko bilan 10-o‘ringa tushib ketgan bo‘lsa, “Ash-SHorta” 3, “Al-Ayn” esa 2 ochko bilan quyi o‘rinlarda qoldi.
Shuni ta’kidlab o‘tish lozimki, umumiy bosqich yakuniga bir tur qolgan bo‘lsa-da, “Al Hilol”, “Al-Ahli”, “An-Nasr”, “As-Sadd” va “Al-Vasl” klublari muddatidan avval 1/16 bosqichiga yo‘l oldi.
