17-18 февраль кунлари футбол бўйича Осиё Элит чемпионлар лигаси умумий босқичининг 8-тур ўйинлари бўлиб ўтади.
Мазкур турда “Пахтакор” – “Ас-Садд”, “Аш-Шорта” – “Ал-Айн”, “Персеполис” – “Ан-Наср”, “Ал-Аҳли” – “Ал-Гарафа”, “Ар-Райян” – “Истиқлол”, “Ал-Ҳилол” – “Ал-Васл” клублари ўзаро рақобатлашади.
8-турнинг биз учун аҳамиятли ўйини, албатта, “Пахтакор” – “Ас-Садд” учрашувидир. Шунингдек, “Персеполис” – “Ан-Наср” ва “Ар-Райян” – “Истиқлол” клублари ўртасидаги баҳслар натижаси ҳам жамоамизнинг кейинги тақдирида муҳим аҳамият касб этади.
Аниқроқ айтадиган бўлсак, 7-тур якунидан сўнг “Пахтакор” 4 очко билан 10-ўринга жойлашган бўлса, “Истиқлол” ва “Персеполис” жамоалари 6 тадан очко жамғарган ҳолда 8-9-ўринларда бормоқда. Шу сабабли, пойтахтимиз клуби 8-турда “Ас-Садд”ни енга олса, шу қаторда “Персеполис” ва “Истиқлол” клублари мағлубиятга учраса, “шерлар“ саккизинчи ўриндан жой олиши ҳамда навбатдаги босқичга ўтиши мумкин.
Шу ўринда, “Пахтакор” – “Ас-Садд” жамоалари баҳсига оид айрим фактларни эътиборингизга ҳавола қилишни лозим топдик. Ушбу жамоалар 2011 ва 2019 йилларда ОЧЛ мусобақасининг гуруҳ босқичида ўзаро ўйин ўтказган. Доҳада мезбонлар ҳар икки ўйинда 2:1 ҳисобида зафар қучган бўлса, Тошкентдаги баҳслар 1:1 ва 2:2 ҳисобида якунланган. Умид қиламизки, бугун маҳаллий вақт билан соат 19:00 да ўтадиган баҳсда жамоамиз мухлисларимиз узоқ кутган муҳим ғалабани қўлга киритади.
Маълумот ўрнида: Осиё Элит чемпионлар лигасининг 7-тур якунига кўра “Ал-Ҳилол” ва “Ал-Аҳли” клублари очколарини 19 тага етказиб олган ҳолда голлар нисбатига кўра, 1- ва 2- поғонадан жой олган.
Шунингдек, “Ан-Наср” жамоаси 16 очко билан учинчи ўринни эгаллаб турибди. “Ас-Садд” 12, “Ал-Васл” 11, “Ар-Райян” 8, “Ал-Гарафа” 7, “Истиқлол” 6 очко жамғариб, кучли 8 таликка якун ясаб берди. Гарчи “Персеполис”да ҳам 6 очко бўлса-да, голлар нисбатига кўра ушбу жамоа 9-ўринда қолди. “Пахтакор” 4 очко билан 10-ўринга тушиб кетган бўлса, “Аш-Шорта” 3, “Ал-Айн” эса 2 очко билан қуйи ўринларда қолди.
Шуни таъкидлаб ўтиш лозимки, умумий босқич якунига бир тур қолган бўлса-да, “Ал Ҳилол”, “Ал-Аҳли”, “Ан-Наср”, “Ас-Садд” ва “Ал-Васл” клублари муддатидан аввал 1/16 босқичига йўл олди.
