O‘zbekiston futbol assosiasiyasi birinchi vise-prezidenti Ravshan Irmatov va hududiy futbol assosiasiyasilari bilan ishlash bo‘limi rahbari Baxtiyor Shirinov Jizzax viloyati futbol akademiyasi, viloyat futbol maktabining hozirgi kundagi holati va yaratilgan sharoitlar hamda amalga oshirilishi lozim bo‘lgan ishlari bilan yaqindan tanishdi.
O‘FA rahbariyati shuningdek Jizzax viloyati hokimi Ulug‘bek Mustafoyev bilan uchrashdi va viloyatda futbol sport turini yanada ommaviyligini oshirishga qaratilgan masalalar yuzasidan fikrlar almashildi. Ravshan Irmatov yig‘ilishda alohida seleksiya ishlari bo‘yicha ham to‘xtalib o‘tdi. Maktablar va mahallalarda seleksiya ishlarini tizimli ravishda to‘g‘ri yo‘lga qo‘yish kerakligi ta’kidlandi.
Shundan so‘ng konferensiyaga delegatlar sifatida Jizzax viloyati boshqarma va tashkilotlar rahbarlari, viloyat futbol akademiyasi va futbol maktabi hamda bir qator futbol fidoyilari ishtirok etishdi.
Jizzax viloyati futbol assosiasiyasi birinchi vise-prezidenti lavozimiga tasdiqlash bo‘yicha konferensiyaning kun tartibidagi masala yuzasidan ovoz berish jarayoni yo‘lga qo‘yildi va bir ovozdan Shuhrat Yuldashev Jizzax viloyati futbol assosiasiyasi birinchi vise-prezidenti etib tayinlandi.
