"Manchester Yunayted" bosh murabbiyi Ruben Amorim nima uchun mavsum o‘rtasida klubda ishlashga qaror qilgani haqida gapirdi.
Portugaliyalik ushbu lavozimni kelasi yozda egallashni afzal ko‘rishini tan oldi, biroq klub o‘z niyatida qat’iy turib oldi.
"Menimcha, bu aniq. Mavsumni jamoa bilan boshlaganingizda, hammasi butunlay boshqacha bo‘ladi. Sizda o‘ylash, futbolchilarni his qilish, mavsumoldi tayyorgarlik ko‘rish, kerakli o‘zgarishlarni amalga oshirish uchun vaqt bor.
Bu aniq, lekin meni tanlov oldiga qo‘yishdi (hozir yoki hech qachon), shuning uchun bu haqda gapirishdan ma’no yo‘q. Bu ishga kirishmoq uchun o‘z sabablarim bor edi. Bilaman, bu og‘ir, xavfli, ammo bu "Manchester Yunayted" taklif bilan chiqsa, "yo‘q" deya olmaysan," - dedi Amorim "Everton"ga qarshi shanba kungi o‘yin oldidan o‘tkazilgan matbuot anjumanida.
