“Santos” klubi futbolchisi Neymar o‘zining mashinalar kolleksiyasini Braziliyaga olib kelolmaydi.

Diario Sport nashrining yozishicha, Braziliyadan tashqarida 12 yil o‘ynab futbolchi hashamatli avtomobillar kolleksiyasini to‘plagan. Mashinalarning salmoqli qismi Saudiya Arabistonidagi faoliyati davomida yig‘ilgan.

Futbolchining avtoulov parkida Rolls-Royce Ghost (ikkinchi avlod), Aston Martin DBX, Bentley Continental GT, Lamborghini Huracan va to‘rtta Mercedes-Benz C-Class kabi modellar bor.

Qayd etilishicha, uning eng qimmat avtomobillari “Al-Hilol” bilan tuzilgan shartnoma doirasida sotib olingan. Klub unga yillik 160 million yevro daromaddan tashqari, har tomonlama imtiyozlar ham taqdim etgan.

Biroq hozirda Neymar o‘z superkarlaridan foydalana olmaydi. Braziliya qonunchiligiga ko‘ra, mahalliy avtomobil sanoatini himoya qilish va nohaq raqobatning oldini olish uchun ishlatilgan avtomobillar importi cheklangan. Mamlakatga faqat 30 yildan oshgan va kolleksiya buyumi sifatida qaraladigan avtomobillarni olib kirish mumkin.

Hozircha futbolchining avtomobillari qayerda ekani haqida aniq ma’lumot yo‘q. Ular Saudiya Arabistonida qolganmi yoki ularning keyingi manzili qayer bo‘lishi haqida hech qanday ma’lumot berilmagan.