“Milan” navbatdagi mag‘lubiyat alamini totib ko‘rdi va A Seriyaning 26-turida “Torino”ga imkoniyatni boy berdi (1:2).

Serxio Konseysau shogirdlari 5-daqiqada gol o‘tkazib yubordi, Malik Tiav avtogol muallifiga aylandi. 74-daqiqada Tijani Reynders “rossonerilar”ga hisobni tenglashtirib, g‘alabaga umid bog‘lagan bo‘lsa, oradan ikki daqiqa o‘tib turinliklar ikkinchi golni urishdi, bunga mehmonlar javob qaytarishmadi.

"Agar biz kuchli to‘rtlikdan joy olishni istasak, bunday tempda davom eta olmaymiz. Bu maqsadga erishish uchun bizda kerakli jihatlar bor, lekin biz o‘z ishimizni qiyinlashtiryapmiz.

Har bir o‘yinda qo‘pol xatolarga yo‘l qo‘yamiz - ulardan qochishga harakat qilishimiz kerak. Biz to‘p bilan ham, to‘psiz ham ko‘proq ustunlik qilishimiz kerak", dedi Reynders.