“Милан” навбатдаги мағлубият аламини тотиб кўрди ва А Сериянинг 26-турида “Торино”га имкониятни бой берди (1:2).

Серхио Консейсау шогирдлари 5-дақиқада гол ўтказиб юборди, Малик Тиав автогол муаллифига айланди. 74-дақиқада Тижани Рейндерс “россонерилар”га ҳисобни тенглаштириб, ғалабага умид боғлаган бўлса, орадан икки дақиқа ўтиб туринликлар иккинчи голни уришди, бунга меҳмонлар жавоб қайтаришмади.

"Агар биз кучли тўртликдан жой олишни истасак, бундай темпда давом эта олмаймиз. Бу мақсадга эришиш учун бизда керакли жиҳатлар бор, лекин биз ўз ишимизни қийинлаштиряпмиз.

Ҳар бир ўйинда қўпол хатоларга йўл қўямиз - улардан қочишга ҳаракат қилишимиз керак. Биз тўп билан ҳам, тўпсиз ҳам кўпроқ устунлик қилишимиз керак", деди Рейндерс.