"Inter Mayami" hujumchisi Lionel Messidan dastxat olgan hakam Marko Antonio Ortis Navu 6 oyga ishdan chetlatildi, deya xabar bermoqda ESPN.

KONKAKAF Chempionlar kubogi 1-davrasidan o‘rin olgan "Inter Mayami" - "Kanzas Siti" (1:0) uchrashuvidan so‘ng hakam argentinalik futbolchining oldiga kelib, sog‘lig‘ida muammosi bor qarindoshi uchun imzo so‘radi.

Shundan so‘ng, KONKAKAF Navani tashkilot turnirlaridagi ishidan chetlatishga qaror qildi. Shu bilan birga, unga Meksika chempionati o‘yinlarini boshqarishga ruxsat berilgan. Qayd etilishicha, qoidabuzarlik takrorlansa, hakam diskvalifikasiya qilinadi.

36 yoshli meksikalik Nava faoliyati davomida 381 ta o‘yinda hakamlik qilgan.