"Интер Майами" ҳужумчиси Лионель Мессидан дастхат олган ҳакам Марко Антонио Ортис Наву 6 ойга ишдан четлатилди, дея хабар бермоқда ESPN.
КОНКАКАФ Чемпионлар кубоги 1-даврасидан ўрин олган "Интер Майами" - "Канзас Сити" (1:0) учрашувидан сўнг ҳакам аргентиналик футболчининг олдига келиб, соғлиғида муаммоси бор қариндоши учун имзо сўради.
Шундан сўнг, КОНКАКАФ Навани ташкилот турнирларидаги ишидан четлатишга қарор қилди. Шу билан бирга, унга Мексика чемпионати ўйинларини бошқаришга рухсат берилган. Қайд этилишича, қоидабузарлик такрорланса, ҳакам дисквалификация қилинади.
36 ёшли мексикалик Нава фаолияти давомида 381 та ўйинда ҳакамлик қилган.













