"Galatasaroy" matbuot xizmati "Fenerbaxche" bosh murabbiyi Joze Mourinyuni tanqid qildi. Bu kechagi "Galatasaroy" – "Fenerbaxche" (0:0) o‘yinidan keyin yuzaga kelgan vaziyatga bog‘liq.  

Uchrashuvdan so‘ng, portugaliyalik mutaxassis raqib jamoa a’zolarini haqorat qiluvchi iboralar bilan tavsiflagan. Jumladan, u "Galatasaroy" zaxira o‘rindig‘i vakillarini "maymunlar kabi sakrayotgan" deb ta’riflagan.  

"Galatasaroy" rasmiy bayonotida shunday deyiladi:  

"Joze Mourinyu Turkiyada ish boshlaganidan beri turk xalqini haqorat qiluvchi bayonotlar berib kelmoqda. Bugun esa uning so‘zlari axloqsiz izohlardan odamgarchilikka zid bayonotlarga aylandi. Biz rasman uning irqchilikka oid fikrlari uchun jinoiy ish qo‘zg‘atish niyatimiz borligini e’lon qilamiz. Shuningdek, UEFA va FIFAga rasmiy shikoyat yo‘llaymiz".

Ayni damda "Galatasaroy" Turkiya chempionatida 24 ta o‘yindan so‘ng 64 ochko bilan birinchi o‘rinni egallab turibdi. "Fenerbaxche" esa 58 ochko bilan ikkinchi o‘rinda joylashgan.