"Manchester Yunayted" bosh murabbiyi Ruben Amorim hujumchi Rasmus Xyoylundning muammolari haqida gapirdi.

22 yoshli futbolchi joriy mavsumdagi o‘yinlari uchun tez-tez tanqidlarga uchradi. U "qizil iblislar" safida barcha musobaqalarda 33 ta o‘yinda 7 ta gol urgan, biroq Premyer-liganing 21 o‘yinida atigi 2 marta raqib darvozasini ishg‘ol qilgan.

"O‘ylashimcha, biz Rasmusga jamoa sifatida yordam bermayapmiz. "MYU" raqib darvozasi oldida tez-tez tahdid solmaydi.

Shu bois men hujumchilarimizga yordam yetishmayotganini his qilyapman. Menimcha, Xyoylund katta salohiyatga ega.

Agar o‘yinimizni yaxshilasak, unda gol urish uchun ko‘proq imkoniyatlar bo‘ladi", - deya Amorimning so‘zlarini keltiradi jurnalist Saymon Stoun.