"Lion" "PSJ" vingeri Xvicha Kvarasxeliyaning Liga 1 o‘yinlaridagi ishtiroki yuzasidan Fransiya Professional futbol ligasi (LFP) yuridik qo‘mitasiga shikoyat qildi, deb yozadi «L’Equipe».

Manbaga ko‘ra, tashkilotga yo‘llangan maktubda jamoa egasi va prezidenti Jon Tekstor gruziyalikning Parij klubiga o‘tishi faqat xorijiy subsidiyalar tufayli mumkin bo‘lganini, bu LFP qoidalari bilan taqiqlanganini aytgan. Bundan tashqari, Kvarasxeliya shartnomasini tan olish va uni yangi futbolchi sifatida ro‘yxatdan o‘tkazish LFP ma’muriy reglamenti qoidalarini ham buzadi, deb hisoblaydi Tekstor.

Qayd etilishicha, ushbu shikoyat parijliklarning "Lion" "Botafogo"dan ijaraga olgan hujumchi Tyago Almadaning o‘yindagi ishtiroki bo‘yicha xuddi shunday murojaatiga javob bo‘lgan.

Liga 1 23-turidan o‘rin olgan "PSJ" - "Lion" bahsida parijliklar 3:2 hisobida zafar quchgandi. Kvarasxeliya golli uzatmani amalga oshirdi.

24 yoshli vinger Parij klubiga 2025 yilning yanvarida "Napoli"dan 70 million yevro evaziga o‘tgandi.