“Inter Mayami” va Argentina terma jamoasi hujumchisi Lionel Messi “PSJ”dagi faoliyati, hozirgi hayoti va kelajagi haqida fikr bildirdi.

Messi Parijdagi faoliyati o‘ziga yoqmagani, u yerda baxtli bo‘lmaganini aytdi.

“Keyin MLSʼda faoliyatimning bir qismini o‘tkazishni o‘yladim. Buni doimo xohlaganman.

“Inter Mayami”ning loyihasi menga yoqdi, klub o‘smoqda, rivojlanmoqda. Bu yerga kelishni, klubga yordam berishni istadim. Shuningdek, MLSʼning jahondagi brendiga katta ta’sir o‘tkazmoqchi bo‘ldim.

MLSʼni tez va kuchli liga deb ayta olaman. Hozir bu yerda ko‘plab yosh futbolchilar kelishmoqda. Barcha jamoalar hujum qilishga, gollar urishga, ochiq o‘yin ko‘rsatishga intilyapti.

Kelajagim? Bu yerda o‘zimni yaxshi his qilyapman va har bir lahzadan, klub, o‘yinlar, do‘stlar, oilam bilan zavq olyapman. Kelajagim haqida oldindan gapirishni istamayman”, – dedi Messi.