Italiya chempionatining 27-turidan o‘rin olgan bahsda “Roma” o‘z maydonida “Komo”ni qabul qilib, 2:1 hisobida g‘alaba qozondi.

Rim klubi kiritgan to‘plariga Salemakers va Dovbik mualliflik qilgan bo‘lsa, Da Kunya “Komo”ning yagona golini o‘z nomiga yozdirib qo‘ydi. O‘zbekiston terma jamoasi a’zosi Eldor Shomurodov uchrashuvni asosiy tarkibda boshladi va bir bo‘lim maydonda harakat qildi. Ikkinchi bo‘limda Shomurodov o‘rniga Dovbik uchrashuvni davom ettirdi.

Sofascore portali 45 daqiqa o‘ynagan o‘zbekistonlik futbolchining harakatlarini 6.5 ballga loyiq ko‘rdi. “Roma”ning o‘yindagi ilk goli muallifi Aleksis Salemakers hamda Eldorning o‘rniga zahiradan maydonga tushib, g‘alaba golini kiritgan Artyom Dovbik 7.2 ball oldi. E’tiborli tomoni, 74-daqiqada Zeki Chelikning o‘rniga zaxiradan maydonga tushib, 2 daqiqa ichida Dovbikning goliga hammualliflik qilgan Devayn Rench Sofascore talqini bo‘yicha uchrashuvni eng yaxshi futbolchisi deya topildi — 7.7 ball.

“Komo” safida yagona gol muallifi Da Kunya jamoasining o‘yindagi eng yaxshi futbolchisi nomini qo‘lga kiritdi — 7.6 ball. Uning goliga hammualliflik qilgan Maksimo Perrone esa 7.2 ballga loyiq ko‘rildi.

Mazkur g‘alabadan keyin “Roma” hisobidagi ochkolar soni 43 taga yetdi va turnir jadvalida 8-o‘rinni band etib turibdi. “Komo” esa 28 ochko bilan 13-pog‘onada qoladigan bo‘ldi.