Италия чемпионатининг 27-туридан ўрин олган баҳсда “Рома” ўз майдонида “Комо”ни қабул қилиб, 2:1 ҳисобида ғалаба қозонди.

Рим клуби киритган тўпларига Салемакерс ва Довбик муаллифлик қилган бўлса, Да Куня “Комо”нинг ягона голини ўз номига ёздириб қўйди. Ўзбекистон терма жамоаси аъзоси Элдор Шомуродов учрашувни асосий таркибда бошлади ва бир бўлим майдонда ҳаракат қилди. Иккинчи бўлимда Шомуродов ўрнига Довбик учрашувни давом эттирди.

Sofascore портали 45 дақиқа ўйнаган ўзбекистонлик футболчининг ҳаракатларини 6.5 баллга лойиқ кўрди. “Рома”нинг ўйиндаги илк голи муаллифи Алексис Салемакерс ҳамда Элдорнинг ўрнига заҳирадан майдонга тушиб, ғалаба голини киритган Артём Довбик 7.2 балл олди. Эътиборли томони, 74-дақиқада Зеки Челикнинг ўрнига захирадан майдонга тушиб, 2 дақиқа ичида Довбикнинг голига ҳаммуаллифлик қилган Девайн Ренч Sofascore талқини бўйича учрашувни энг яхши футболчиси дея топилди — 7.7 балл.

“Комо” сафида ягона гол муаллифи Да Куня жамоасининг ўйиндаги энг яхши футболчиси номини қўлга киритди — 7.6 балл. Унинг голига ҳаммуаллифлик қилган Максимо Перроне эса 7.2 баллга лойиқ кўрилди.

Мазкур ғалабадан кейин “Рома” ҳисобидаги очколар сони 43 тага етди ва турнир жадвалида 8-ўринни банд этиб турибди. “Комо” эса 28 очко билан 13-поғонада қоладиган бўлди.