Xokkey bo‘yicha yoshlar o‘rtasidagi jahon chempionatida Vatanimiz sharafini himoya qilayotgan O‘zbekiston U-18 termasi navbatdagi turda g‘alabaga erishdi.

III divizionning "B" guruhida kurash olib borayotgan yoshlarimiz bu safar Turkmaniston terma jamoasini mag‘lub etdi.

Bangkokdagi “International Ice Hockey Arena” majmuasida kechgan qiziqarli o‘yinda hamyurtlarimiz Turkmaniston terma jamoasini 8:2 hisobida dog‘da qoldirdi.

Terma jamoamizga g‘alaba keltirgan o‘yinda turkmanistonliklar darvozasiga yo‘llangan shaybalarga Rustamxonov(3), Kamolov, Popov, Ravshanov, Dadaxo‘jayev, Azimov mualliflik qildi.

Ortda qolgan 3 ta uchrashuvda muvaffaqiyatga erishgan yosh xokkeychilarimiz “B” guruhda 9 ochko bilan yetakchilik qilmoqda. Hamyurtimiz Jasurbek Rustamxonov shaybalar uzatmasi va urilgan gollar (9+7) hisobiga ko‘ra, chempionatning to‘purari bo‘lib turibdi.

Bugun, 4 mart kuni O‘zbekiston U-18 termasi navbatdagi o‘yinda Bosniya va Gersegovina jamoasi bilan ro‘baro‘ keladi.

Jahon chempionati bahslari 6 martga qadar davom etadi.