Jizzaxdagi “So‘g‘diyona” sport majmuasida o‘smirlar o‘rtasida badiiy gimnastika bo‘yicha mamlakat chempionati o‘tkazildi.

Unda mamlakatimizning turli hududlaridan kelgan 80 nafar gimnastikachi qizlar yakkalik va 15 ta jamoa guruh bahslarida o‘z omadini sinab ko‘rdi.

Chempionatning jamoaviy ko‘pkurash bellashuvlarida Toshkent shahri jamoasi 467,55 ball jamg‘arib, oltin medalni qo‘lga kiritgan bo‘lsa, Samarqand jamoasi 453,05 ball bilan ikkinchi pog‘onadan joy oldi. Navoiy sharafini himoya qilgan gimnastikachilar jamoasi esa 395,9 ball to‘plagan holda kuchli uchlikni yakunladi.

Yakkaliklar o‘rtasidagi halqa va tasmada mashq bajarish bo‘yicha Viktoriya Nikiforova, bulava bilan mashq ko‘rsatishda Sofiya Usova barcha raqiblarini ortda qoldirdi. Shuningdek, ko‘pkurash bahslarida Viktoriya Nikiforova, Sofiya Usova, Sabrina Zarifboyeva shohsupaga ko‘tarildi.  

Guruh mashqining ko‘pkurash yo‘nalishida Gimnastika bo‘yicha ixtisoslashtirilgan respublika bolalar-o‘smirlar olimpiya zaxirasi sport maktabi jamoasi g‘olib bo‘ldi.