Juma kuni Belgiya terma jamoasining mart oyidagi yig‘iniga chaqirilgan futbolchilar ro‘yxati e’lon qilindi. Ahamiyatlisi, ro‘yxatdan "Real" darvozaboni Tibo Kurtua ham o‘rin olgan.
Oxirgi marta Kurtua 2023 yil iyun oyida Belgiya terma jamoasida o‘ynagan. Shundan so‘ng, darvozabon Domeniko Tedesko bilan munosabatlaridagi muammolar tufayli "qizil iblislar" safida o‘ynamadi. Yanvar oyida ushbu mutaxassis Belgiya terma jamoasi bosh murabbiyligidan ketgandi. Hozirda jamoani Rudi Garsiya boshqarmoqda.
Belgiya terma jamoasini Millatlar ligasi pley-off bosqichi doirasida Ukrainaga qarshi ikkita o‘yin kutib turibdi - safarda (20 mart) va uyda (23 mart). Turnirning keyingi mavsumida qarama-qarshilik g‘olibi A ligada, mag‘lub esa B ligada ishtirok etadi.
