Superliganing 2-turidan o‘rin olgan «Sho‘rtan» – «Bunyodkor» (0:2) uchrashuvidan so‘ng jamoamiz ustozi Ilyos Zeytullayev OAV xodimlarining savollariga javob qaytardi.

- Barchaga xayrli kech. Oson o‘yin bo‘ldi, deya olmayman. Chunki har ikkala jamoa ham so‘nggi daqiqalargacha kurashdi. Ishonamanki, «Sho‘rtan» mavsum davomida ko‘plab jamoalarga bosh og‘riq bo‘ladi. Raqibni o‘rganib chiqqandik, tarkibida individual mahoratli futbolchilar bor. Mavsum endigina start olgani tufayli hali xulosa qilishga erta. Jamoaga navbatdagi uchrashuvlarda omad tilayman!

Natijadan kelib chiqqan holda bugungi o‘yinimizdan qoniqish hosil qildim, ammo mavsumning ilk uchrashuvlari sababli xatolarimiz ham bor. Lekin safarda g‘alaba qozona olganimiz yoqimli holat.

Jamoamizda seleksiya ishlariga mas’ul insonlar bor. Qishki yig‘inlar davomida tarkibimizni bir qator legionerlar bilan kuchaytirlik. O‘tgan mavsum o‘zini ko‘rsatgan Urata bilan shartnomani uzaytirdik. Kachorri bugun dubl qayd etdi. Aslida biz uchun legioner yoki mahalliy futbolchi bo‘lishining ahamiyat yo‘q, muhimi jamoamizga nafi tegishi kerak. Qolaversa, yoshlar bizning kelajagimiz, ular o‘yindan-o‘yinga o‘sib borishi lozim.